KYK REEKS

Dit was ook een van die oudste fotoverhale wat verskyn het. Dit het verhale oor die alledaagse lewe uitgebeeld. Daar was nie ’n spesifieke hoofkarakter nie. Daar is grootliks van akteurs met Italiaanse name gebruik gemaak. Foto’s van die akteurs het gereeld in die binne blaaie van die boekies voorgekom. KYK was ook die eerste fotoverhaal wat in A4 grootte verskyn het. Die verhale het afgewissel tussen liefdesverhale, dramas en ook aksie belaaide verhale. Weens die groot verskeidenheid van verhale was die tydskrif baie gewild en het gou ’n groot leserstal opgebou.

Die verskeidenheid het daartoe bygedra dat dit byval gevind het by beide mans en vroue. In my dae was dit meer bekend as “grootmens” leesstof en was die verhale hoofsaaklik op die volwasse mark gerig. Weens die uiteenlopendheid van die verhale kan ’n mens aanneem dat ’n wye verskeidenheid skrywers waarskynlik meegedoen het aan die skrywe van die verhale. Geen skrywers erkenning word in die boekies aangedui nie, (deur Koos Papenfus).